公視臺語台為著培養新聞的人才，辦理學生主播的培訓計畫，要選出10位學生主播，來播
送臺語台上新的節目「公民咱的新聞」。也鼓勵民眾會當成做臺語台的公民記者，用台語
來報導地方的大代誌。

公視臺語台舉辦學生主播的培訓甄選，3/30這工是上尾仔的試鏡，學生攏用無仝的風格先
自我介紹，紲落來現場播4條新聞，評審表示，參加甄選的學生攏真拍拚，逐家攏真有企
圖心，袂驚鏡頭，表現了誠好。

試鏡現場的攝影棚外口，濟濟學生手提主播稿，那唸那記錄，會當感受著逐家心情攏真緊
張。臺語台南部中心為著這改的甄選，有先安排攏總15點鐘的課程，邀請主播、配音員佮
學生分享播音的撇步，按怎共華語稿改做台文稿等等技巧，學生講，上課了後，知影真濟
台語新詞，也向望咱的母語會當湠落去。

71位報名的學生，干焦有24位通過審評，通參加培訓課程，上尾階段的試鏡，會閣選10位
學生主播，參與未來臺語台上新的節目「公民咱的新聞」的主持，這个節目按算六月播出
。